Einhverra hluta vegna sýndu nemendurnir mínir í rokksögu meiri viðbrögð við að sjá Bruna BB afhausa hænsni í Rokk í Reykjavík en þegar einn nemandinn tók upp á því að sýna í glærusjói mynd af söngvara Mayhem þar sem hann lá með heilasletturnar lekandi á gólfið fyrir framan sundurskotinn hausinn á sér (mynd sem 'vinur hans' og meðhljómsveitarmeðlimur tók af líkinu eftir að hafa komið að því og prýddi plötuumslag næstu plötu hljómsveitarinnar).

Ég hef áhyggjur af samhyggð nemenda ef þeir finna meira til með hænsnum en heimskum.

Var að hugsa um að fara út í umræður um hvort það væri ekki skemmtilegra fyrir hænurnar að deyja fyrir listina en fyrir KFC en ákvað að láta spurninguna fram án frekari umræðna.

Þá minnti þetta mig á áhugaverða rannsókn sem ég heyrði af um daginn þar sem kom fram að tré gefa frá sér væl þegar þau eru veik. Þau semsagt tjá tilfinningar. Sem fékk mig aftur til að muna eftir atriði úr A bit of Fry and Laurie sem mér finnst alveg bráðfyndið.